Qubanın Bad kəndində sakinlər qış aylarında hətta 1 stəkan çay içməyə su tapmırlar. Bu barədə ShimalNews 27 yanvar tarixində Baku TV-yə istinadən xəbər verir.
“Bu 2 gənc Vətən müharibəsində səngərdə su tapıb, amma burada - evlərində su yoxdur”, “Əgər qışda su yoxdursa, deməli, yaydan heç danışılası deyil”, “Sonra deyirlər ki, camaat köçüb gedir şəhərə. Buna cavanlıq demək olmaz, biz cavan kimi yaşaya bilmirik burada”, - bu kimi sözləri kənd sakinləri deyirlər.
Bad kəndi rayon mərkəzindən 25 km məsafədə yerləşir. Onun 700-ə yaxın, əsasən, təsərrüfatla məşğul olan əhalisi var. Burada qazılan artezian quyusunda su yoxdur, ətrafda olan bulaqlar və çay quruyub.
Mütəxəssislər bu ərazidə olan Bad çayının mənbəyinə baxış keçiriblər. Bildirilib ki, buradan kəndə su xətti çəkilə bilər. Məsafə uzaq olduğuna görə, daxili ehtiyatlar hesabına bunu etmək mümkün olmayıb. Bu səbəbdən İcra Hakimiyyəti tərəfindən Nazirlər Kabinetinə müraciət olunub.
