Vətən müharibəsində şəhid olan təhsil işçiləri arasında Şamaxı və Oğuzdan olan müəllimlər də var.
Shimal.News xəbər verir ki, 5 Oktyabr – Beynəlxalq Müəllimlər Günüdür.
44 günlük Vətən müharibəsində Azərbaycanın təhsil işçiləri də torpaqlarımızın azadlığı uğrunda döyüşüb. Məlumata görə, müharibə zamanı 700-ə yaxın təhsil işçisi döyüşlərdə iştirak edib, onlardan 20-si şəhidlik zirvəsinə ucalıb. Şimal bölgəsindən olan müəllimlər də həmin sırada yer alıb.
Elgün Quliyev 17 sentyabr 1992-ci ildə Şamaxı rayonunun Göylər kəndində anadan olub. O, 2020-ci ildə müəllimlərin işə qəbulu imtahanından keçərək Lerik rayonunun Sors kəndində müəllim kimi fəaliyyətə başlayıb.
Elgün Quliyev 9 noyabr 2020-ci ildə Şuşa uğrunda döyüşlərdə şəhid olub. O, ölümündən sonra "Vətən uğrunda" və "Şuşanın azad olunmasına görə" medalları ilə təltif edilib.
Rəvan Lətifov isə 26 avqust 1991-ci ildə Oğuz rayonunun Xaçmaz kəndində anadan olub. O, Ə.Abdulhüseynov adına Sincan kənd tam orta məktəbində məktəbdənkənar və sinifdənxaric tərbiyə işi üzrə təşkilatçı, daha sonra isə həmin məktəbdə təşkilatçı müavin vəzifəsində çalışıb.
Rəvan Lətifov 6 noyabr 2020-ci ildə Daşaltı–Şuşa istiqamətində döyüşlərdə şəhid olub.
Şəhid müəllim "Vətən uğrunda", "Şuşanın azad olunmasına görə" və "Cəsur döyüşçü" medalları ilə təltif edilib.
