Quba Rayon Mərkəzi Xəstəxanasının inzibati işlər üzrə direktor müavini tutduğu vəzifədən kənarlaşdırılıb.
Shimal.News-un əldə etdiyi məlumata görə, TƏBİB-in qərarı ilə Əfqan Paşayev barəsində Əmək Məcəlləsinin 70-ci maddəsinin "ç" bəndi tətbiq olunub.
İşdən çıxarılma Əmək Məcəlləsinin 70-ci maddəsinin "ç" bəndi ilə rəsmiləşdirilib. Buna səbəb kimi arayışların verilməsi məsələsinə nəzarətin lazımi səviyyədə həyata keçirilməməsi göstərilib.
Qərarın xəstəxana kollektivində təəssüf və narazılıq yaratdığı bildirilir. Paşayevin uzun müddət ərzində tibb müəssisəsinin fəaliyyətinə verdiyi töhfələr kollektiv tərəfindən yüksək qiymətləndirilib.
Əldə etdiyimiz məlumata görə, Əfqan Paşayev işdən azad edilməsi ilə bağlı məhkəməyə müraciət edib.
Qeyd edək ki, Əmək Məcəlləsinin 70-ci maddəsinin "ç" bəndinə əsasən, işəgötürən işçinin əmək funksiyasını və ya əmək müqaviləsi üzrə öhdəliklərini yerinə yetirməməsi, yaxud əmək vəzifələrini kobud şəkildə pozması hallarında əmək müqaviləsinə xitam verə bilər. Bu əsasla işdən çıxarılmanın qanuniliyi mübahisələndirildikdə, pozuntunun və işçinin təqsirinin sübuta yetirilməsi məsələsi məhkəmədə araşdırıla bilər.