Zaqatalanın Aşağı Tala kəndində keçmiş məcburi köçkünlər üçün salınan qəsəbədə istilik təchizatı bəzi sakinlərin əvvəlki illərdən qalan borclarına görə dayandırılıb.
Sakinlər iki həftədən çoxdur soyuq evlərdə yaşayırlar. Borcun ümumi məbləğinin 7-8 min manata çatdığı bildirilir.
Sakinlərin sözlərinə görə, təxminən 25-30 nəfərin borcunu ödəməməsi bütün qəsəbənin istiliksiz qalmasına səbəb olub. Onlar borcu olmayan ailələrin də soyuq şəraitdə yaşamağa məcbur edilməsindən narazıdırlar. Xüsusilə azyaşlı uşaqları olan ailələr vəziyyətin çətin olduğunu bildirirlər.
Sakinlərdən biri evində səkkiz azyaşlı övladının olduğunu, istilik olmadığı üçün uşaqların soyuqdan əziyyət çəkdiyini deyib. Digər sakin isə ailəsində körpə uşağın da olduğunu vurğulayaraq, özünün borcu olsa belə, digər ailələrin buna görə cəzalandırılmasının düzgün olmadığını bildirib.
Narazılıq məktəb və uşaq bağçasına da təsir edib. Sakinlərin iddiasına görə, noyabrın 1-dən 13-dək 130 məktəbli və 50 bağça uşağı soyuq şəraitdə qalıb. Onlar təhsil müəssisələrinin istilik borcunun olmadığını qeyd edirlər.
Zaqatala İstilik Sistemləri İstismarı Sahəsinin rəisi İsi Əsgərovun sözlərinə görə, istilik mərkəzləşdirilmiş qazanxana vasitəsilə verildiyindən borclu mənzilləri digər abonentlərdən ayrıca ayırmaq mümkün deyil.
Sahə rəisi qeyd edib ki, borcu olan və hazırda mənzillərdə yaşamayan sakinlərin istilik sistemindən ayrılması üçün müvafiq icra orqanının göstərişi tələb olunur. Bu addım atıldıqdan sonra digər sakinlərə istiliyin verilməsi mümkün olacaq.
Qəsəbə icra nümayəndəliyindən isə bildirilib ki, sakinlərlə birgə iş aparılır, borclulara xəbərdarlıq edilir və problemin yaxın günlərdə həlli üçün tədbirlər görüləcək. Mənbə: İTV