Xaçmazdakı kənd tam orta məktəbinin binasının divarlar çatlayıb, sanitar qovşağı isə yararsız vəziyyətdədir.
Sakinlərin Shimal.News-a verdikləri məlumata görə, Ağyazı-Buduq kəndində yerləşən Əlibala Zəkəryayev adına tam orta məktəbin binası uzun müddətdir nəzarətsiz qalıb.
Vətəndaşların sözlərinə görə, qış aylarında sinif otaqları o qədər soyuq olur ki, orada hətta böyüklərin oturması çətindir. Şagirdlər soyuq şəraitdə dərs keçməli olur, tez-tez xəstələnirlər. Məktəbin sanitar qovşağı belə istifadəyə yararsızdır.
Sakinlər binanın istismar müddətinin başa çatdığını, divarlarda çatlar yarandığını, məktəbin vəziyyətinin şagirdlərin sağlamlığı və təhlükəsizliyi üçün risk yaratdığını deyirlər.
Onların iddiasına görə, aidiyyəti qurumlara dəfələrlə müraciət edilsə də, indiyədək problemin həlli istiqamətində tədbir görülməyib. Vətəndaşlar məktəbin vəziyyətinin araşdırılmasını və əsaslı təmir olunmasını tələb edirlər.