Bu gün şəhidlərimiz - Nurağa Tağıyev, Elnur Kərimov və Rizvan Əhmədovun doğum günüdür.
Nurağa Davud oğlu Tağıyev 20 aprel 2001-ci ildə Xaçmaz rayonunda anadan olub. 2018-ci ildə 3 nömrəli tam orta məktəbi bitirib və hərbi xidmətə yollanıb.
O, 2020-ci il sentyabrın 27-də Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi və Azərbaycanın ərazi bütövlüyünün bərpası məqsədilə başlanan Vətən müharibəsində iştirak edib. Goranboy rayonunun Ağcakənd qəsəbəsində hərbi xidmətini davam etdirib. Vətən müharibəsi zamanı Kəlbəcər istiqamətində, Murovdağda şəhid olub.
Nurağa Tağıyev "İgidliyə görə", "Vətən uğrunda", "Suqovuşanın azad olunmasına görə" medalları ilə təltif edilib.
Elnur Adil oğlu Kərimov 20 aprel 1994-cü ildə Qax rayonunun Almalı kəndində anadan olub. 2023-cü ilin yazında könüllü olaraq hərbi xidmətini davam etdirmək üçün yenidən MAXE kimi xidmətə qayıdıb. Qeyd edək ki, Elnur Kərimov evli idi və bir oğlu var.
O, ölümündən sonra "Vətən uğrunda" medalı və 3-cü dərəcəli "Vətənə xidmətə görə" ordeni ilə təltif edilib.
Rizvan Niyazi oğlu Əhmədov 20 aprel 1996-cı ildə Şəki rayonunun Cumakənd kəndində anadan olub. Cumakənd kənd tam orta məktəbini bitirib. Azərbaycan Silahlı Qüvvələrinin sıralarında hərbi xidmətdə olub. Bir müddət mülki sahədə çalışdıqdan sonra Silahlı Qüvvələrin Təlim və Tədris Mərkəzində "gizir hazırlığı" kurslarında iştirak edib və "gizir" rütbəsi ilə xidmətini davam etdirib.
Azərbaycan Silahlı Qüvvələrinin giziri olan Rizvan Əhmədov 21 sentyabr 2023-cü il tarixində həyata keçirilən uğurlu lokal antiterror tədbirləri zamanı Xankəndi şəhərində şəhid olub.
O, 3-cü dərəcəli "Vətənə xidmətə görə" ordeni və "Vətən uğrunda" medalı ilə təltif edilib.
