Milli Hidrometeorologiya Xidməti iyun ayı üzrə hava proqnozunu açıqlayıb.
Shimal.News xəbər verir ki, bu ilin iyun ayında havanın orta aylıq temperaturunun əsasən iqlim normasına yaxın, bəzi ərazilərdə isə bir qədər yüksək olacağı gözlənilir. Yağıntıların isə əsasən norma daxilində olacağı bildirilir.
Proqnoza əsasən, iyun ayının ilk günlərində bəzi rayonlarda arabir yağış yağacaq. Ayrı-ayrı ərazilərdə qısamüddətli intensiv yağıntı, şimşək, dolu hadisələrinin baş vermə ehtimalı var.
Balakən, Zaqatala, Qax, Şəki, Oğuz, Qəbələ, İsmayıllı, Ağsu, Şamaxı, Siyəzən, Şabran, Xızı, Quba, Xaçmaz və Qusar rayonlarında orta aylıq temperaturun 20-24°C təşkil edəcəyi gözlənilir. Bu göstəricinin iqlim normasına yaxın və bəzi yerlərdə bir qədər yüksək olacağı qeyd olunub.
Ay ərzində gecə saatlarında havanın temperaturu 17-22°C, gündüz isə 23-28°C isti olacaq. Bəzi günlərdə temperaturun 34-39°C-yə qədər yüksələcəyi ehtimal edilir. Dağlıq ərazilərdə isə gecələr 4-9°C, gündüzlər 13-18°C isti olacaq, bəzi günlərdə temperatur 20-25°C-yə çata bilər.
Sinoptiklərin məlumatına görə, aylıq yağıntının miqdarı əsasən iqlim normasına yaxın olacaq.
