Xaçmaz şəhərinin Bakı prospektində yerləşən Heydər Əliyev seyrəngahında bir müddət əvvəl gündəmə gətirilən problemlərin bir qismi aradan qaldırılıb.
Shimal.News-un seyrəngahın baxımsız vəziyyətini ictimailəşdirdikdən sonra ərazidə abadlıq və təmizlik istiqamətində müəyyən işlər görülüb.
Belə ki, uzun müddət fəaliyyətsiz qalan bulaqlara yenidən su verilib. Seyrəngahdakı oturacaqlar təmir olunaraq rənglənib, ərazidə ot biçini aparılıb, ağacların bir hissəsi budanıb.
Bundan başqa, uzun müddət boş qalan bəzi iaşə obyektlərinin icarəyə verildiyi müşahidə olunur ki, bu da seyrəngahın canlanmasına müsbət təsir göstərir. Həmçinin əvvəllər zədələnmiş və sındırılmış heykəllər ərazidən götürülüb.
Bununla belə, seyrəngahda kompleks təmir və yenidənqurma işlərinə hələ də ehtiyac qalır. Ərazidə bəzi problemlərin tam həlli üçün əlavə tədbirlərin görülməsi vacibdir.
