Xaçmaz rayonunun Nabran ərazisinə daxil olan Seyidli kəndində antisanitar vəziyyətlə bağlı sakinlərin narazılığı nəticə verib.
Dünən Shimal.News-a müraciət edən kənd sakinlərinin bildirdiklərinə görə, ərazidə uzun müddətdir zibil qutuları yoxdur, tullantılar isə vaxtında daşınmırdı.
Bu gün sakinlər redaksiyamıza yenidən müraciət edərək qeyd ediblər ki, operativ şəkildə tədbir görülüb və ərazidə yığılıb qalmış zibil təmizlənib:
“Çox sağ olun, nəhayət ki, gəlib təmizlədilər. Lakin səhər bəzi yerlərdə zibillər mövcud idi. İndi onları da yandırıblar”.
Sakinlər tərəfindən təqdim olunan fotolardan da görünür ki, bəzi tullantılar toplansa da, bir hissəsi yandırılıb. Mütəxəssislər isə qeyd edirlər ki, açıq ərazidə zibilin yandırılması ekologiyaya və insan sağlamlığına ciddi təhlükə yaradır.
Vətəndaşlar görülən tədbiri müsbət qiymətləndirsələr də, gələcəkdə bu cür halların təkrarlanmaması üçün ərazidə daimi zibil qutularının yerləşdirilməsini və tullantıların təhlükəsiz formada daşınmasını istəyirlər.
