Quba şəhərində yerləşən Zaur Cəfərov adına 3 saylı orta məktəbin qarşısında yaranmış təhlükəli vəziyyət aradan qaldırılıb.
Shimal.News xəbər verir ki, redaksiyamıza daxil olan məlumata əsasən, Əliqulu Nərimanov küçəsinin sözügedən hissəsində piyada keçidinin zolaqları silinmiş, "piyadalara yol ver" nişanı isə sürücülər üçün çətin görünən vəziyyətdə idi. Bu səbəbdən məktəblilər yolu keçərkən ciddi risklərlə üzləşirdilər.
Məsələ redaksiyamız tərəfindən ictimailəşdirildikdən sonra aidiyyəti qurumlar tədbir görüblər. Nəticədə piyada keçidinin zolaqları bərpa edilib.
Sakinlər problemin qısa müddətdə həllinə görə təşəkkür edərək, bu kimi məsələlərin vaxtında diqqətdə saxlanılmasının vacibliyini vurğulayıblar.
