Şimal bölgəsində intensiv yağıntılar nəticəsində yaranan sel fəsadları təhsil müəssisələrinə də təsir göstərib. Bir sıra kənd məktəblərində dərslər müvəqqəti olaraq təxirə salınıb.
Shimal.News xəbər verir ki, Xaçmaz rayonunda Hacılar kənd ümumi orta məktəbinin və Cığatay kənd ibtidai məktəbinin həyətlərini su basıb. Sel suları məktəblərin zirzəmilərinə və bəzi sinif otaqlarına dolub. Hacılar məktəbində 85, Cığatay məktəbində isə 25 şagird təhsil alır.
Ümumilikdə Xaçmazda dərslərin təxirə salındığı məktəblərin sayı 10-dan çoxdur. Quba, Qusar, Şabran və Siyəzən rayonlarında isə bu cür məktəblərin sayı 10-a yaxındır. Bəzi məktəblərdə sinif otaqlarına və zirzəmilərə su dolduğu halda, digərlərində şagirdlərin məktəbə gedən yollarının sel səbəbindən keçilməz olması tədris prosesinin dayandırılmasına səbəb olub.
Hazırda ərazilərdə yaranmış fəsadların aradan qaldırılması üçün müvafiq dövlət qurumlarının nümayəndələri tərəfindən tədbirlər görülür.
Quba-Xaçmaz Regional Təhsil İdarəsindən bildirilib ki, son günlər müşahidə olunan yağıntılı hava şəraiti ilə əlaqədar ucqar kəndlərdə yerləşən bəzi məktəblərdə davamiyyət azalıb. Təhlükəsizliyin təmin olunması məqsədilə çətin relyefə malik ərazilərdə yerləşən az sayda təhsil müəssisəsində tədris prosesində qısamüddətli fasilələr yaranıb.
Qeyd olunub ki, dərslərdə yaranan fasilələr sonradan dərs cədvəlinə uyğun şəkildə kompensasiya ediləcək, bu məqsədlə sıxlaşdırılmış qrafik tətbiq oluna bilər.
