Şəkidən olan azərbaycanlı idmançı Turqut İsmayılov bu dəfə uğurları ilə beynəlxalq kino səhnəsində diqqət çəkib.
Qarışıq döyüş növləri üzrə dəfələrlə Dünya və Avropa çempionu olan İsmayılov dünya şöhrətli aktyor və döyüş sənətləri ustası Ceki Çanla eyni ekran layihəsində yer alıb.
İdmandakı nailiyyətləri ilə tanınan Turqut İsmayılovun kino sahəsində də təcrübəsi var. O, Moskvada çəkilən "Время вперёд" sənədli filmində İngiltərə quru qoşunlarının komandanı, "Васнецова" detektiv serialında isə müstəntiq obrazını canlandırıb. Müxtəlif ekran işlərində fərqli rollarda çıxış edən idmançı bu sahədə də təcrübə qazanıb.
İsmayılovun fəaliyyəti yalnız idman və kino ilə məhdudlaşmır. Keçmiş polis əməkdaşı hazırda hüquqşünas kimi çalışır və peşəkar fəaliyyətinin paralelində idmanla məşğul olmağı davam etdirir.
Onun adı Arzu Jaeed tərəfindən hazırlanan "My Name is Yeter. Enough!" tammetrajlı sənədli film layihəsi ilə də əlaqələndirilir. Məlumata görə, filmin Azərbaycanla yanaşı Türkiyə, Misir və Monteneqroda çəkilişlərinin aparılması və 2027-ci ildə tamamlanması planlaşdırılır.
Bir vaxtlar tatami və rinqdə Azərbaycanı təmsil edən Şəki əsilli dünya çempionu indi beynəlxalq kino layihəsində kamera qarşısına keçir. İdman, hüquq-mühafizə, hüquq və kino sahələrini birləşdirən Turqut İsmayılovun hekayəsi Şəkidən beynəlxalq ekranlara qədər uzanır.
Mənbə: Bugun.tv
