Şamaxı rayonunda torpaq sürüşməsi qeydə alınıb. Sürüşmə Cabanı–Əngəxaran avtomobil yolunun 11-ci kilometrliyində baş verib. Hadisə nəticəsində yolun bir hissəsi çöküb və nəqliyyatın hərəkəti üçün təhlükəli vəziyyət yaranıb.
AZƏRTAC-ın məlumatına görə, torpaq sürüşməsi yolun təqribən 30 metrlik hissəsini sıradan çıxarıb, yarğan əmələ gəlib.
Yerli sakinlərin sözlərinə görə, sürüşmə hər gün daha da aktivləşir. Son günlərdə müşahidə olunan intensiv yağıntılar bu prosesi daha da sürətləndirib.
Əraziyə baxış keçirən yol idarəsinin əməkdaşları təhlükəli sahəni xüsusi xəbərdarlıq nişanları və lentlərlə işarələyiblər. Sürücülərə maksimum ehtiyatlı olmaları, mümkün olduqda isə alternativ marşrutlardan istifadə etmələri tövsiyə olunur.
19 nömrəli Xüsusi Təyinatlı Yol İstismarı MMC-nin sahə rəisi Şahin Rəcəbov bildirib ki, sürüşmə ilə bağlı idarənin əməkdaşları əraziyə baxış keçiriblər. “Hazırda təhlükəli ərazilər lentlə işarələnib. Mövcud vəziyyətlə bağlı aidiyyəti qurumlara məlumat verilib. Yaxın günlərdə həmin ərazidə bərpa işlərinə başlanılması planlaşdırılır”, – deyə o qeyd edib.
Şamaxı torpaq sürüşmələrinin tez-tez baş verdiyi seysmik aktiv zonada yerləşir. Hazırda ərazidə müvafiq qurumlar tərəfindən monitorinq işləri aparılır və vəziyyət nəzarətdə saxlanılır.
