Son dövrlərdə Şabran şəhərinin ümumi vəziyyəti, xüsusilə də işıqlandırma sahəsindəki problemlər şəhər sakinlərini ciddi şəkildə narahat edir.
Shimal.News redaksiyasına müraciət edən sakinlər bildirirlər ki, şəhərin elektrik sistemləri olduqca köhnəlib və baxımsız vəziyyətdədir.
Gecələr küçələrin qaranlıq olması həm şəhərin ümumi estetik görünüşünə, həm də vətəndaşların gündəlik həyatına mənfi təsir göstərir.
Şəhərdə işıqlandırma işlərinə cavabdeh olan qurumlar məsuliyyətsiz və fəaliyyətsizdirlər. Onlar bu problemin səbəbi kimi texniki imkanların məhdudluğunu göstərirlər. Lakin maraqlıdır ki, ictimaiyyətin və medianın diqqəti bu məsələyə yönəldiyi anda, bir gün ərzində texniki vasitələrin tapılması və problemlərin qismən də olsa aradan qaldırılması mümkün olur. Bu isə imkanların əslində mövcud olduğunu, sadəcə olaraq iradə və təşəbbüsün çatışmadığını göstərir.
Şabran sakinləri bu məsələlərin bir daha diqqətdən kənarda qalmamasını tələb edirlər:
“İki metr elektrik xəttinin dəyişdirilməsi və ya əsas küçələrin işıqlandırılması üçün vətəndaş təşəbbüsünə ehtiyac olmamalıdır. Bu, bilavasitə dövlət qurumlarının və yerli icra hakimiyyətinin vəzifəsidir.
Əgər bu gün Şabran şəhəri qaranlıqda qalırsa və abadlıqdan uzaq vəziyyətdədirsə, bunun məsuliyyəti birbaşa aidiyyəti qurumların üzərinə düşür”.
