Şabran şəhərinin Məhəmməd Əsədov küçəsi 2 ay öncə təmirə bağlanıb. Bu müddətdə ərazi bərbad hala salınıb.
Sakinlərin Shimal.News-a verdiyi məlumata görə, yola daş tökülüb və bununla iş dayandırılıb. Hazırda küçədə nə maşınlar, nə də piyadalar rahat hərəkət edə bilmir.
Sürücülər avtomobillərini qorumaq üçün labirintdəki kimi və ehtiyatla manevr edirlər. Piyadalar isə hər addımlarını diqqətlə atmalıdırlar. Çünki asfaltlanmalı olan yerdə indi gölməçələr və toz içində itib-batan bir yol var.
Şabran İcra Hakimiyyəti bu təmirə başlayanda sakinlər ümidlənmişdi. Axı yol mədəniyyətin göstəricisidir. Amma nəticə o oldu ki, indi yol təhlükəli, həm də daha çətin keçilən vəziyyətə düşüb. Hər halda, küçənin indiki halı bir şeyi açıq göstərir: burada görülən iş "qaş düzəltmək" yox, "göz çıxarmaq" olub. Sakinlər ümid edir ki, tezliklə yol doğrudan da təmir ediləcək, yoxsa gedişat belə davam etsə, küçə tamamilə keçilməz hala düşəcək.
View this post on Instagram
