Qusar rayonunun Avaran kəndində içməli su təchizatı layihəsi icra olunur.
Rayon icra hakimiyyətindən bildirilib ki, kəndin dayanıqlı içməli su ilə təmin olunması məqsədilə icra edilən layihənin birinci mərhələsi 2025-ci ildə başa çatdırılıb. Su təchizatı üçün Cağar-Cibir su kanalından 1,4 kilometr məsafədən su xətti çəkilib və kənddaxili şəbəkə qurularaq 125 ev təsərrüfatının su təchizatı təmin edilib. Hazırda layihənin ikinci mərhələsinin icrasına başlanılıb. Bu mərhələdə Avaran kəndinin digər hissəsində yerləşən 284 ev təsərrüfatının içməli su ilə təmin olunması nəzərdə tutulur.
Xürel kəndində isə sakinlərin təbii qazla təmin olunması istiqamətində işlər davam etdirilir. Tikinti işləri yekunlaşdıqdan sonra 300-dək abonent ilk dəfə "mavi yanacaq"la təmin olunacaq.
"Qusar rayonunda əhalinin sosial rifahının yüksəldilməsi, infrastruktur təminatının yaxşılaşdırılması istiqamətində bir sıra işlər həyata keçirilir. Rayon icra hakimiyyətinin başçısı Sahir Məmmədxanov və əlaqədar qurumların nümayəndələri Avaran və Xürel kəndlərində infrastruktur layihələrinin icra vəziyyəti ilə yerində tanış olub. Layihələrin icrasını həyata keçirən podratçı təşkilatın nümayəndələri görülən işlərin cari vəziyyəti, texniki göstəricilər və növbəti mərhələdə icrası nəzərdə tutulan işlər barədə ətraflı məlumat veriblər. Podratçı təşkilatın nümayəndələrinə işlərin təsdiq olunmuş layihə-smeta sənədlərinə uyğun, yüksək keyfiyyətlə və müəyyən edilmiş müddətdə başa çatdırılması ilə bağlı tapşırıq və tövsiyələr verilib", - deyə məlumatda vurğulanıb.
