Qusar rayonunda Xocalı faciəsinin 34-cü ildönümü münasibətilə anım tədbiri keçirilib.
Shimal.News xəbər verir ki, tədbir Qusar Dövlət Ləzgi Dram Teatrında təşkil olunub.
Mərasimdə rayon icra hakimiyyətinin başçısı Sahir Məmmədxanov, icra aparatının məsul şəxsləri, şəhid ailələri və qazilər, hüquq-mühafizə orqanlarının rəhbərləri, ziyalılar və ictimaiyyət nümayəndələri iştirak ediblər.
Teatrın direktoru Faiq Qardaşovun Xocalı soyqırımının faciəvi hadisələrini sənədli faktlar əsasında təqdim etdiyi "Çiçəklən Xocalı" ədəbi-bədii kompozisiyası nümayiş etdirilib. Səhnə əsərində şahid ifadələri və bədii təsvirlər vasitəsilə tamaşaçılar o qanlı günlərin reallıqları ilə yenidən üz-üzə qalıblar.
Vətən müharibəsi şəhidi Çoban Nurmətovun qardaşı Təbrik Nurmətov və anası Raziyyə Nurmətova çıxış edərək Xocalının azad olunmasının qürurunu bölüşüblər.
Saat 17:00-da Xocalı şəhidlərinin xatirəsi bir dəqiqəlik sükutla yad olunub.
