Qusar rayonunda qarlı və buzlu hava sakinlər üçün əsl bayram ab-havası yaradıb. Soyuq və şaxtaya baxmayaraq, enişli küçələrdə toplaşan insanlar gülüş, sevinc və mehribanlıq dolu anlar yaşayıblar.
Shimal.News xəbər verir ki, yerli əhali adətə uyğun olaraq buzlu küçələrdə sürüşərək qış günlərini əyləncəyə çevirib.
Sakinlərin sözlərinə görə, yol nə qədər buzlu və sürüşkən olarsa, üzərində sürüşmək də bir o qədər maraqlı və həyəcanlı olur. Bunun üçün isə bəzən sadəcə ayaqda olan ayaqqabı kifayət edir.
Küçələrdə bir-birindən tutaraq sürüşənlər, oturacaqlı xizək üzərində şən anlar yaşayanlar, hətta kartondan istifadə edərək uşaqlıq sevincini yenidən yaşayanlar diqqət çəkib. Bu mənzərə Qusarda qışın soyuğunu unutduran, ürəkləri isidən xoş xatirələr yaradıb.
