Qusar rayonunda qazlaşdırma, yol infrastrukturu və təhsil müəssisələrinin abadlaşdırılması istiqamətində bir sıra layihələr həyata keçirilib.
Belə ki, Rayon İcra Hakimiyyətinin müraciəti əsasında "Azəriqaz" İstehsalat Birliyi tərəfindən Xürel kəndində magistral və daxili qaz xətlərinin çəkilişi işləri başa çatdırılıb. Bildirilib ki, yaxın vaxtlarda kənd sakinlərinin evlərinə təbii qazın verilməsinə başlanılacaq.
Bununla yanaşı, Qusar Rayon İcra Hakimiyyəti və Hil kənd bələdiyyəsinin birgə təşəbbüsü ilə Hil kənd məscidinə gedən 250 metrlik yola asfalt örtüyü çəkilib. Layihə çərçivəsində ərazidə abadlıq işləri aparılıb, məscidin ətrafı kol-kosdan təmizlənib və yeni ağaclar əkilib.
Təhsil infrastrukturunun yaxşılaşdırılması istiqamətində isə Qusar Peşə Liseyinin həyətində 450 kvadratmetr sahəyə asfalt döşənib. Eyni zamanda liseyin idman zalının pəncərələrinə müasir tor quraşdırılıb. Rayon İcra Hakimiyyəti bu istiqamətdə işlərin mərhələli şəkildə davam etdiriləcəyini bildirib.
