Qusar şəhərində fəaliyyət göstərən Pəri şadlıq sarayında aparılan yoxlama zamanı ciddi yanğın təhlükəsizliyi pozuntuları aşkar edilib.
Shimal.News xəbər verir ki, Fövqəladə Hallar Nazirliyinin Dövlət Yanğın Nəzarəti Xidməti tərəfindən keçirilən yoxlama nəticəsində müəyyən olunub ki, obyektdə mövcud nöqsanlar insan həyatı və sağlamlığı, ətraf mühit və dövlət əmlakı üçün birbaşa təhlükə yaradır.
Yoxlama zamanı aşkarlanan əsas nöqsanlar:
avtomatik yanğınxəbərverici siqnalizasiya sisteminin tam quraşdırılmaması və nasaz vəziyyətdə olması;
elektrik təsərrüfatının təhlükəsizlik qaydalarına uyğun quraşdırılmaması;
odsöndürən balonların istifadəyə yararsız vəziyyətdə olması;
mətbəxdə standartlara uyğun olmayan qaz sobaları və rezin qaz borularından istifadə edilməsi;
pilləkən qəfəslərində yanar materialların yığılması;
təxliyə planının hazırlanmaması;
taxta konstruksiyaların odadavamlı məhlulla işlənməməsi;
zal hissəsində tezalışan materiallardan istifadə olunması;
tüstü bacasının təmizlənməməsi;
"Çıxış" işıqlı göstəricilərinin quraşdırılmaması.
Qurumdan bildirilib ki, mövcud vəziyyət obyektin fəaliyyətinin davam etdirilməsi halında hər an baş verə biləcək yanğının qısa müddətdə genişlənərək faciə ilə nəticələnməsi riskini artırır.
Aşkarlanan kobud pozuntular nəzərə alınaraq, "Pəri" şadlıq sarayının fəaliyyətinin dayandırılması barədə qərar qəbul olunub. Qərarın bir nüsxəsi obyekt nümayəndəsinə təqdim edilib.
