Quba rayonunun Qəçrəş kəndi ərazisində 5-ci sinif şagirdinin faciəvi şəkildə boğulması ilə nəticələnən hadisədən günlər keçib. Lakin ərazidə təhlükəsizliklə bağlı ciddi problem hələ də aradan qaldırılmayıb.
Shimal.News-a müraciət edən sakinlər bildiriblər ki, faciənin baş verdiyi ərazidə yerləşən və Qubanın üç kəndini birləşdirən körpü təxminən bir ay əvvəl sel nəticəsində dağılıb. Buna baxmayaraq, indiyədək heç bir bərpa işinə başlanılmayıb.
Sakinlərin sözlərinə görə, Sovet dövründə inşa olunan körpü uzun illər istifadədə olub. Taxta döşəmələrinin bir hissəsi sıradan çıxsa da, kəndlilər ondan istifadə edə bilirdilər. Bir müddər əvvəl Qudyalçayın sel suları onu dağıdıb.
Hazırda insanlar çayın üzərində qalan beton dayaqların üzərinə taxtadan düzəldilmiş nərdivan vasitəsilə keçməyə məcbur qalırlar. Bu isə xüsusilə uşaqlar, yaşlılar və qadınlar üçün ciddi həyat riski yaradır.
Sakinlər bildirirlər ki, "artıq bir aya yaxındır heç bir tədbir görülmür".
Onların sözlərinə görə, kəndin aşağı hissəsində başqa bir körpü olsa da, həmin körpü özəl sahibkar tərəfindən bərpa edilərək ödənişli istifadəyə verilib. Ondan əsasən turistlər istifadə edirlər.
Qeyd edək ki, 13 iyul tarixində məhz bu ərazidə baş verən faciə zamanı Qəçrəş kənd sakini, 5-ci sinif şagirdi Qudyalçaya düşərək həyatını itirmişdi.
Sakinlər faciənin təkrarlanmaması üçün aidiyyəti qurumları təcili şəkildə təhlükəsiz piyada körpüsünün inşasına və ərazidə zəruri təhlükəsizlik tədbirlərinin görülməsinə çağırırlar.
