"Azərbaycan Avtomobil Yolları Dövlət Agentliyi" (AAYDA) publik hüquqi şəxs yolda yaranan çökək səbəbindən qəzaya düşən sürücüyə təzminat ödəyəcək.
“Qaynarinfo”nun məlumatına görə, qəza bir neçə ay əvvəl Bakı-Quba yolunun 119-cu km-də, saat 23:30 radələrində qeydə alınıb. B.F. idarə etdiyi avtomobillə Quba şəhəri istiqamətində hərəkətdə olub. Həmin vaxt yolun hərəkət hissəsində yaranmış çökəklik səbəbindən qəza baş verib.
Sürücü AAYDA-nı məhkəməyə verərək vurulmuş maddi zərərin əvəzi olaraq 1153 manatın və mənəvi zərər görə təzminatın əvəzi olaraq 5000 manatın, həmçinin 35,05 manat ödənilmiş məhkəmə rüsumunun, eləcə də hüquqi yardım xidmətləri üçün vəkilə ödənilmiş 320 manat xidmət haqqının, ümumilikdə 6504,53 manat məbləğində pul vəsaitinin tutularaq ona verilməsi barədə qətnamə qəbul edilməsini xahiş edib.
Məhkəmə maddi zərərin əvəzi olaraq 900 manat və əlavə olaraq 33 manat dövlət rüsumunun AAYDA-dan tutularaq, iddiaçıya ödənilməsi barədə qərar qəbul edib.
