Quba şəhərinin mərkəzində yerləşən Meydan istirahət parkında aparılan abadlıq və yenidənqurma işləri təhlükəsizlik baxımından narahatlıq doğurur.
Shimal.News-un əldə etdiyi məlumata görə, parkın girişində yerləşən hündür arkalarda aparılan söküntü işləri zamanı təhlükəsizlik qaydalarına əməl olunmur. İşçilər heç bir qoruyucu vasitə – təhlükəsizlik dəbilqəsi, qoruyucu kəmər və digər zəruri avadanlıq olmadan çalışırlar.
Mütəxəssislərin fikrincə, bu cür şəraitdə aparılan işlər istənilən an bədbəxt hadisə ilə nəticələnə bilər.
Qeyd edək ki, bu, Qubada təhlükəsizlik qaydalarının pozulması ilə bağlı ilk hal deyil. Bir müddət əvvəl Bayraq meydanında aparılan abadlıq işləri zamanı Quba Rayon İcra Hakimiyyətinin əməkdaşlarından biri təhlükəsizlik tədbirlərinə əməl olunmaması səbəbindən hündürlükdən yıxılaraq ağır xəsarət almışdı.
