Quba rayonu Mirzəmməmməd kəndində şəhid Miqdad Faiq oğlu Abduləlimov küçəsindəki yolların vəziyyəti sakinləri narahat edir.
Məsələ ilə bağlı Shimal.News-a danışan yerli sakinlərin sözlərinə görə, xüsusilə yağışlı havalarda bu küçədə avtomobil idarə etmək demək olar ki, mümkünsüz olur.
“Yolun asfaltsız və səthinin çınqıllarla dolu bərbad vəziyyətdə olması nəqliyyatın hərəkətini çətinləşdirir. Suyun yığılması və çökəkliklərin çoxluğu avtomobillərin sürüşməsi və zərər görməsi riskini artırır. Təcili tibbi yardım və digər xidmət avtomobilləri bu küçədə çətinliklə hərəkət edir.
Dəfələrlə aidiyyəti qurumlara müraciət etsək də, hələ ki, heç bir tədbir görülməyib”, - deyə sakinlər bildiriblər.
