Quba rayonunun Qarxun kənd sakinləri internet xəttinin çəkilişi ilə bağlı işlərin yarımçıq saxlanıldığını bildirirlər.
Sakinlərin sözlərinə görə, 2025-ci ilin noyabr ayında kəndə internet xəttinin çəkilməsi məqsədilə rabitə dirəklərinin quraşdırılması üçün quyular qazılıb. Lakin işlər dekabr ayından etibarən dayandırılıb və indiyədək başa çatdırılmayıb.
Kənd sakinləri bildirirlər ki, mobil rabitənin zəif olması səbəbindən yaxınları ilə əlaqə saxlamaqda çətinlik çəkirlər. Onların sözlərinə görə, xüsusilə yaşlı insanlar şəhərdə yaşayan övladları ilə ünsiyyət qurmaqda ciddi problemlərlə üzləşirlər.
Məsələ ilə bağlı "Aztelekom" MMC-dən bildirilib ki, Qarxun kəndində GPON fiberoptik şəbəkə layihəsi üzrə tikinti-quraşdırma işlərinin böyük hissəsi artıq tamamlanıb.
Qurumun açıqlamasına görə, ərazinin mürəkkəb dağlıq relyefi və əlverişsiz hava şəraiti səbəbindən layihənin icrasında müəyyən gecikmələr yaranıb. Hazırda işlərin yekunlaşdırılması istiqamətində tədbirlər davam etdirilir və tikinti-quraşdırma prosesinin cari həftə ərzində başa çatdırılması planlaşdırılır.
Bildirilib ki, layihə tam başa çatdıqdan sonra Qarxun kəndinin sakinləri yüksək sürətli internet və müasir telekommunikasiya xidmətləri ilə təmin olunacaqlar.
Mənbə: Xezerxeber.az
