Quba rayonunun Zərqava kəndinin "İnqilab" məhəlləsində yaşayanlar yararsız yol şəraitindən şikayətçidirlər.
Sakinlərin sözlərinə görə, yolun bərbad vəziyyəti səbəbindən nəqliyyat vasitələri əraziyə daxil ola bilmir, bu isə xüsusilə xəstələrin, məktəblilərin və yaşlı insanların hərəkətini çətinləşdirir.
"Anam yaşlı qadındır, vəziyyəti pisləşəndə təcili yardım çağırdıq. Amma avtomobil evimizə çata bilmədi. Onu beş-altı nəfərlə qucaqda kəndin mərkəzinə qədər apardıq, oradan isə xəstəxanaya çatdırdılar", – deyə sakinlərdən biri bildirib.
Kənd camaatının sözlərinə görə, yağışlı havalarda yol tamamilə keçilməz olur. Uşaqlar məktəbə getməkdə çətinlik çəkir, avtomobillər isə kəndin aşağı hissəsində qalır. Sakinlər gündəlik ərzaq və digər yükləri kilometrlərlə məsafəni piyada qət edərək daşımalı olurlar.
"Qonaqlarımız yarı yoldan geri qayıdır. Məcbur olub qaz balonunu, ərzağı və digər yükləri belimizdə evə gətiririk. Bəzən bunu atla belə etmək mümkün olmur", – deyə kənd sakinləri bildiriblər.
Sakinlər qeyd edirlər ki, bir neçə il əvvəl yolu öz vəsaitləri hesabına qismən bərpa etsələr də, son daşqınlar nəticəsində görülən işlər yenidən sıradan çıxıb. Onların sözlərinə görə, dəfələrlə aidiyyəti qurumlara müraciət etsələr də, problem hələ də həllini tapmayıb.
Məsələ ilə bağlı açıqlama verən yerli bələdiyyə nümayəndəsi bildirib ki, sözügedən küçənin uzunluğu təxminən 1 kilometrdir və yeni bələdiyyə yaradıldıqdan sonra burada bir neçə dəfə texnika işləyib. O qeyd edib ki, yaxın vaxtlarda bələdiyyənin imkanları çərçivəsində həmin küçədə təmir işlərinin aparılması planlaşdırılır.
Mənbə: Baku TV
