Quba rayonunun Bəhrəli kəndində (Timiryazev) kanalizasiya sistemi ilə bağlı problem sakinlərin narazılığına səbəb olub.
Shimal.News-a müraciət edən sakinlərin sözlərinə görə, Şəhid Rəvan Əliyev küçəsinin Vaqif küçəsi ilə kəsişdiyi ərazidə yağan cüzi yağış belə kanalizasiya xətlərinin daşmasına səbəb olur. Nəticədə çirkab suları küçəyə yayılır, yaşayış evlərinin həyətlərini və zirzəmilərini su altında qoyur.
Sakinlər bildirirlər ki, kanalizasiya sularının daşması ərazidə günlərlə davam edən kəskin üfunət iyinə və antisanitar vəziyyətə səbəb olur. Bu isə həm yaşayış şəraitini ağırlaşdırır, həm də sakinlərin sağlamlığı üçün ciddi təhlükə yaradır.
Onların sözlərinə görə, problem uzun müddətdir davam etsə də, indiyədək aradan qaldırılmayıb. Kənd sakinləri aidiyyəti qurumlardan məsələ ilə bağlı təxirəsalınmaz tədbirlərin görülməsini tələb edirlər.
