Quba bu günlərdə qışın sərt üzünü görür. Hava şəraitinin kəskin dəyişməsi, güclü qar və şaxta hər kəsi çətin vəziyyətdə qoyub. Lakin qışı daha da çətinləşdirən əsas problem elektrik enerjisi ilə bağlıdır.
Shimal.News xəbər verir ki, Bağbanlı qəsəbəsinin sakinləri üçün isə bu problem daha da ağırdır.
Xüsusilə yeni yaşayış massivində vəziyyət dözülməz həddə çatıb. İnsanlar günlərlə işıqsız qalır, evlərdə istilik sistemi işləmir, məişət texnikası sıradan çıxır. Bir sözlə, qəsəbə sakinləri XXI əsrdə, informasiya texnologiyalarının zirvədə olduğu bir dövrdə, şam işığında oturmağa məcbur qalırlar.
"Azərişıq" isə bu problemləri həll etməkdə yetərincə çevik və məsuliyyətli davranmır. Hər il təkrar olunan eyni problemlər, həll olunmayan naqillər, köhnəlmiş transformatorlar və ardıcıl baş verən qəzalar artıq adi hal alıb. Sakinlər dəfələrlə aidiyyəti qurumlara şikayət etsələr də, dəyişən bir şey yoxdur.
Bəs problem nədədir? Yoxsa Quba kimi turistik və strateji əhəmiyyətli bir şəhərin işıq təsərrüfatına diqqət yetirmək üçün hansısa böyük fəlakət baş verməlidir? "Azərişıq" və digər müvafiq qurumlar bu acınacaqlı vəziyyətə dərhal müdaxilə etməlidir. Əks halda, bu qarlı gündə sakinlər təkcə soyuqdan deyil, biganə münasibətdən də donacaq.
