Quba rayonunun Alekseyevka kəndində antisanitar vəziyyət yaranıb. Sakinlər bu halın çox ərazilərdə müşahidə olunmasından narahatdırlar.
Bu barədə Shimal.News-a danışan yerli əhalinin sözlərinə görə, Quba-Xaçmaz yolunun kənarında yerləşən zibil qutuları yararsız vəziyyətdədir. Konteynerlərin əksəriyyətinin qapağı yoxdur, bəziləri isə artıq sınıb.
Kənd sakinləri qeyd edirlər ki, zibilin yığılması üçün hər ay əhalidən 3 manat ödəniş alınmasına baxmayaraq, mövcud vəziyyət dəyişmir. Qapaqsız konteynerlər səbəbindən sahibsiz itlər tullantıları ətrafa dağıdır və nəticədə ərazi daha da çirklənir.
Onların sözlərinə görə, problem təkcə bir nöqtə ilə məhdudlaşmır. Zibil qutularının yerləşdirildiyi bir çox küçələrdə də vəziyyət eynidir. Nəticədə natəmizlik hökm sürür.
Vətəndaşlar aidiyyəti qurumlardan problemin aradan qaldırılması və zibil konteynerlərinin yenilənməsini xahiş edirlər.
