Xəbər verdiyimiz kimi, Quba rayonunun Tüləkaran kəndi istiqamətində baş verən torpaq sürüşməsi nəticəsində avtomobil yolu tamamilə yararsız vəziyyətə düşüb.
Sürüşmə nəticəsində yol yatağı çökərək dərin yarğan əmələ gətirib. Hadisə zamanı ərazidən keçən rabitə və elektrik xətləri də zədələnib.
Sürüşmə səbəbindən 6 kəndin rayon mərkəzi ilə nəqliyyat əlaqəsi kəsilib. Yerli sakinlər bildirirlər ki, uzun illərdir həmin ərazi düz yol olub və əvvəllər burada belə bir problem yaşanmayıb.
Problemin aradan qaldırılması məqsədilə Azərbaycan Avtomobil Yolları Dövlət Agentliyinin 5 saylı Yol İstismar İdarəsi tərəfindən Ağçayın kənarı boyunca alternativ marşrutun inşası həyata keçirilib.
Qurumun nümayəndələrinin sözlərinə görə, ərazidə suyun axınının təmin edilməsi üçün borular quraşdırılıb, yolun üzərinə isə ilk mərhələdə 30 santimetr qalınlığında qırmadaş örtüyü salınıb. Yeni yolun ümumi uzunluğunun 2,5 kilometr olacağı bildirilir.
İşlərin növbəti mərhələsində əlavə qatın döşənməsi nəzərdə tutulur ki, nəqliyyat vasitələrinin hərəkəti təhlükəsiz şəkildə təmin olunsun.
Hazırda ərazidə sürüşmə prosesi nəzarətdə saxlanılır və aidiyyəti qurumlar vəziyyətin tam sabitləşdirilməsi istiqamətində işləri davam etdirirlər.
Mənbə: Xezerxeber.az
