Kiçik Çillə Qubaya sərt üzünü göstərir.
Shimal.News məlumat verir ki, rayon ərazisində yollar buz bağlayıb, amma nə qum var, nə də duz.
Sürücülər isə sanki xizək üzərində avtomobil idarə edirlər. Adətən, belə hallarda müvafiq idarələr hərəkətə keçər, yollar təmizlənər, təhlükə sovuşar. Amma burada vəziyyət başqadır – yol idarəsinin texnikası hərəkətə keçmək üçün "köhnə təkərlər" bəhanəsinə sığınıb.
Təsəvvür edin, yanğını söndürmək üçün su yoxdur, xəstəni aparmaq üçün təcili tibbi yardım maşını "benzinimiz qurtarıb" deyir və ya bir əsgər döyüş meydanında "silahım xarabdır" bəhanəsi ilə səngərdə oturur.
Yol idarəsinin yanaşması da eynilə belədir: "Texnikamız var, amma hərəkət edə bilmir."
Bəs bu texnikanın təkərlərinin vaxtında dəyişdirilməsi kimin vəzifəsidir? Hər il dövlət büdcəsindən yolların qışa hazır olması üçün ayrılan vəsait hara gedir? Yoxsa, bu təkərlər yalnız hesabatlarda yenilənir?
Sürücülər məcburən öz çarələrini axtarır – biri maşının yük yerinə kisələrlə qum qoyur ki, ağırlaşsın, digəri təkərlərin hava təzyiqini azaldır ki, yola yapışsın, kim isə ümumiyyətlə, avtomobilini bir kənara qoyub piyada yola davam edir.
Ancaq bu yollar yalnız sürücülər üçün deyil, təcili tibbi yardım, yanğınsöndürən və digər operativ nəqliyyat vasitələri üçün də açıq olmalıdır.
Buzlu yolların qurbanları statistik rəqəmlərə çevriləndə, cavabdeh qurumlar məsələnin üstünə gedir, amma çox gec olur.
Bəlkə də yol idarəsinin bəhanələri buza səpilən duz kimi əriyib yox olacaq, amma o vaxta qədər sürücülərin duaları, manevrləri və ehtiyatlılıqları onların yeganə xilasıdır.
Qış hələ uzun sürəcək, sual isə qalır: Yolları təhlükəsiz edən yol idarəsinin vəzifəsi olmalıdır, yoxsa sadəcə, sürücülərin bacarığı?
Hacı Murad
