Bu gün Qubadan olan şəhidlərimiz - Səmural Fətəliyev və Afər Orucovun doğum günləridir.
Səmural Ayaz oğlu Fətəliyev 13 mart 1997-ci ildə Quba rayonunun Əlibəyqışlaq kəndində anadan olub. 2003-cü ildə Quba rayon Musa Qonaqov adına Əlibəyqışlaq kənd tam orta məktəbinin 1-ci sinfinə gedib. 2012-ci ildə Quba şəhərində yerləşən Azad Məmmədov adına 2 nömrəli təbiət fənləri təmayüllü məktəb-liseyə qəbul olub.
Liseyi başa vurduqdan sonra Azərbaycan Memarlıq və İnşaat Universitetinin Tikinti-İqtisad fakültəsinin "Sənayenin təşkili və idarə edilməsi" ixtisasına qəbul olunub.
2018-ci ildə ali təhsilini başa vuran Səmural həmin ilin iyul ayında qardaşı ilə birlikdə həqiqi hərbi xidmətə çağırılıb və Vətənə xidmətə yola salınıb.
2019-cu ilin iyul ayında ehtiyata buraxılıb. O, 2020-ci ildə könüllü olaraq Vətən müharibəsində iştirak edib. Füzuli uğrunda gedən ağır döyüşlərdə böyük şücaət göstərib. Qəhrəman döyüşçü 5 oktyabr 2020-ci ildə Füzuli rayonunun Seyidəhmədli kəndi istiqamətində gedən şiddətli döyüşlər zamanı qəhrəmancasına şəhid olub.
Səmural Fətəliyev ölümündən sonra "Vətən uğrunda" və "Füzulinin azad olunmasına görə" medalları ilə təltif edilib.
Afər Yafət oğlu Orucov 13 mart 1996-cı ildə Quba rayonunun Aşağı Atuc kəndində anadan olub.
2001-2013-cü illərdə Quba rayonunun Aşağı Atuc kənd tam orta məktəbində təhsil alıb. 2014-2015-ci illərdə Azərbaycan Silahlı Qüvvələrinin sıralarında müddətli həqiqi hərbi xidmət keçib.
Azərbaycan Daxili İşlər Nazirliyinin Daxili Qoşunlarının çavuşu olan Afər Orucov 2020-ci il sentyabrın 27-də başlayan Vətən müharibəsi zamanı Füzuli və Şuşa uğrunda gedən döyüşlərdə iştirak edib. O, 7 noyabr 2020-ci ildə Şuşa döyüşləri zamanı şəhid olub.
Afər Orucov ölümündən sonra "Vətən uğrunda", "Şuşanın azad olunmasına görə" və "Füzulinin azad olunmasına görə" medalları ilə təltif edilib.
