Bu gün Qubanın igid oğulları - şəhid Rəvan Əhmədov və Cəmil Xələfovun doğum günüdür.
Rəvan Yafət oğlu Əhmədov 25 fevral 2002-ci ildə Quba rayonunun Əlibəyqışlaq kəndində anadan olub. Vətən müharibəsi zamanı XT qrupunda kəşfiyyatçı-qumbaraatan köməkçisi kimi hərbi xidmətini yerinə yetirib. O, Şuşa istiqamətində gedən ağır döyüşlərdə şərəflə vuruşub. Rəvan Əhmədov 11 noyabr tarixində Şuşa uğrunda gedən döyüşlərdə qəhrəmancasına şəhid olub.
Ölümündən sonra "Vətən uğrunda", "Şuşanın azad olunmasına görə" və "Xocavəndin azad olunmasına görə" medalları ilə təltif edilib.
Cəmil Fikrət oğlu Xələfov 25 fevral 1997-ci ildə Quba rayonunun Nərimanabad kəndində anadan olub.
2015-2016-cı illərdə Azərbaycan Silahlı Qüvvələrinin "N" saylı hərbi hissəsində müddətli həqiqi hərbi xidmət keçib. Vətən müharibəsi başlayarkən Azərbaycan Ordusunun əsgəri kimi sentyabrın 27-dən etibarən Ermənistanın işğalı altında olan torpaqlarımızın azad edilməsi uğrunda gedən döyüşlərə qatılıb. Cəmil Xələfov Füzulinin azadlığı uğrunda aparılan döyüşlərdə iştirak edib və 8 oktyabr tarixində qəhrəmancasına şəhidlik zirvəsinə ucalıb.
O da ölümündən sonra "Vətən uğrunda" və "Füzulinin azad olunmasına görə" medalları ilə təltif edilib.
