Quba rayonunun Alekseyevka kəndində zibil qutusu və sahibsiz it problemi narahatlıq yaradır.
Shimal.News-a müraciət edən sakinlərin sözlərinə görə, uzun müddətdir kəndin küçələrində zibil qutuları yoxdur.
Sakinlər məişət tullantılarını yaxınlıqdakı digər yaşayış məntəqələrinin — o cümlədən Quba şəhərinin küçələrində yerləşdirilən zibil qutularına daşımağa məcbur qalırlar.
Onlar bildirirlər ki, zibil qutularının olmaması həm ətraf mühitin çirklənməsinə, həm də tullantıların nəzarətsiz şəkildə atılmasına səbəb olur. Bu isə kənddə sanitar-gigiyenik vəziyyətin getdikcə pisləşməsi riskini artırır.
Digər ciddi problem isə sahibsiz itlərlə bağlıdır. Kənd sakinlərinin bildirdiyinə görə, küçələrdə sərbəst dolaşan sahibsiz itlər xüsusilə uşaqlar və yaşlılar üçün təhlükə mənbəyinə çevrilib. Axşam saatlarında və səhər tezdən insanlar kənddə sərbəst hərəkət edə bilmədiklərini, tez-tez itlərin hücum təhlükəsi ilə qarşılaşdıqlarını deyirlər.
Sakinlər məsələ ilə bağlı dəfələrlə aidiyyəti qurumlara müraciət etdiklərini, lakin problemə hələ də ciddi şəkildə baxılmadığını bildirirlər. Onlar ərazidə zibil qutularının quraşdırılmasını və sahibsiz itlərlə bağlı təxirəsalınmaz tədbirlərin görülməsini tələb edirlər.
