Qubada yol təmiri adı ilə başlanan işlər uzun müddətdir ki, yarımçıq saxlanılıb. Nəticədə Alekseyevka kəndində təhsil alan 1200-dən çox şagird hər gün palçıq və çirkab içində məktəbə gedir, avtomobillər isə dağılmış yollarda sıradan çıxır.
Bu barədə Shimal.News-a məlumat verən sakinlər bildiriblər ki, söhbət Quba-Xaçmaz və Bakı-Quba yollarını birləşdirən hissədən gedir.
“Avtomobillərin hərəkəti zamanı yağış və çirkab suları qarışaraq piyadaların üzərinə sıçrayır. Hər gün məktəblilər və təhsil işçiləri bundan əziyyət çəkir. Eyni zamanda yoldan istifadə edən yüzlərlə yük maşını da bu çala-çuxura tab gətirmir və sıradan çıxır. Vəziyyət çox acınacaqlıdır”, - deyə sakinlər şikayət edirlər.
Onların sözlərinə görə, quru havada toz-torpaq, yağışlı havada isə palçıq həyatlarını dözülməz edib. Dəfələrlə aidiyyəti qurumlara müraciət olunsa da, nəticə yoxdur.
Məlumat üçün qeyd edək ki, Quba 5 saylı Yol İstismar İdarəsi tərəfindən həmin yolda 26 gün əvvəl təmir işlərinə başlanılıb. Lakin asfalt dağıdıldıqdan sonra heç bir iş görülməyib.
