Quba şəhərində yol nişanlarının həddindən artıq sıx yerləşdirilməsi sürücülər arasında narazılıq yaradıb.
Sürücülərin Shimal.News-a danışdığına görə, H.Əliyev prospektində, Bakı istiqamətindən Asan Xidmət mərkəzinin qarşısındakı dairəyə yaxınlaşan hissədə bir neçə yol nişanı eyni nöqtədə və ya bir-birinə çox yaxın məsafədə yerləşdirilib. Bu isə xüsusilə həmin əraziyə ilk dəfə gələn sürücülərdə çaşqınlıq yaradır.
Bildirilir ki, nişanların bu şəkildə toplanması hədsiz informasiya çoxluğu yaradır və sürücülər müəyyən çətinliklər çəkirlər. Nəticədə bəzi hallarda qəza şəraiti yaranır və sürücülər cərimələrlə üzləşirlər.
Xüsusilə Bakıdan gələn turistlər və şəhəri yaxşı tanımayan sürücülər dairəyə yaxınlaşarkən tərəddüd edir, bu da yol hərəkətində təhlükəli vəziyyətin yaranmasına səbəb olur.
Mütəxəssislərin sözlərinə görə, yol nişanları arasında məsafə yaşayış məntəqələrində adətən 50–100 metr, yaşayış məntəqələrindən kənarda isə 150–300 metr və daha çox olmalıdır.
Sürücülər aidiyyəti qurumlara müraciət edərək həmin ərazidə yol nişanlarının sayının və yerləşmə qaydasının yenidən nəzərdən keçirilməsini xahiş edirlər.
