Xalq şairi Sabir Rüstəmxanlı görkəmli maarifçi və mütəfəkkir Abbasqulu ağa Bakıxanovun Qubadakı ev-muzeyinin acınacaqlı vəziyyətini sərt sözlərlə tənqid edib.
Shimal.News məlumat verir ki, Amsar kəndində yerləşən muzeyin köhnə və baxımsız binada fəaliyyət göstərməsi ictimai narazılığa səbəb olub.
Xalq şairi qeyd edib ki, Bakıxanovun dağılmaqda olan ev-muzeyi həm onun adına, həm də Azərbaycan mədəniyyətinə yaraşmır:
"Doğrudanmı, Quba rayonunun Bakıxanovun adına layiq bir muzey tikmək imkanı yoxdur? Mikayıl Müşfiqin Xızı yolundakı muzeyi kimi, Bakıxanovun dağılmaqda olan, adına layiq olmayan ev-muzeyi də ürəyimi kədər və təəssüflə doldurdu. Doğrudanmı, Mədəniyyət nazirliyimizin əlaqədar əməkdaşlarının ev-muzeyləri yaratmaq təcrübəsi və fəlsəfəsi bu qədər bəsitdir? İsidilməyən binanın buz kimi soyuq otaqlarında titrəyə-titrəyə bizə məlumat verən işçilərin dediyinə görə muzeyə gələn çoxdur. Bu muzey Bakıxanov və onun mühiti haqqında nə verə, hansı təəssüratı yarada bilər?"
