Quba rayonunun 2-ci Nügədi kəndində qəzalı vəziyyətdə olan elektrik dirəyi sakinlərin narahatlığına səbəb olub.
Shimal.News-a müraciət edən kənd sakinlərinin sözlərinə görə, dirək hər ötən gün yaxınlığındakı fərdi yaşayış evinə doğru daha çox əyilir. Onlar bildirirlər ki, dirəyin aşması həm insanların həyatı, həm də əmlakı üçün ciddi təhlükə yarada bilər.
Sakinlər xüsusilə küləkli hava şəraitində riskin daha da artdığını qeyd edərək, baş verə biləcək bədbəxt hadisənin qarşısının əvvəlcədən alınmasının vacibliyini vurğulayırlar.
Vətəndaşlar aidiyyəti qurumdan əraziyə baxış keçirilməsini, qəzalı elektrik dirəyinin təcili olaraq yenilənməsini və təhlükənin aradan qaldırılmasını xahiş edirlər.
