Qubanın Zərdabi inzibati ərazi dairəsinə daxil olan kəndlərin sakinləri suvarma kanallarının lildən təmizlənməməsindən narazılıq edirlər.
Shimal.News-a müraciət edən sakinlərin bildirdiyinə görə, Zərdabi qəsəbəsi, Bağbanlı, Amsarqışlaq və Barlı kəndləri ərazisində yerləşən beton suvarma kanallarının böyük əksəriyyəti tamamilə lillə dolub və faktiki olaraq yararsız vəziyyətə düşüb.
Suvarma mövsümünün başlanmasına az vaxt qalıb. Mövcud texnika isə bir gün ərzində fasiləsiz işləsə belə, cəmi 100–200 metr məsafəni təmizləyə bilər. Deməli təmizləmə işlərinə ötən ilin sonlarından başlanmalı və proses yeni suvarma mövsümünə qədər yekunlaşdırılmalı idi. Hazırda kanalların ətrafında insan boyunu ötən qamışlıqlar və qalın lil qatı var.
Sakinlər iddia edirlər ki, Quba Su-Meliorasiya Sistemlərinin İstismarı İdarəsinə məxsus texnikalar təmizləmə işlərinə cəlb olunmaq əvəzinə, fərdi şəxslərə günlük kirayə verilir. Onların sözlərinə görə, həmin texnikaları Quba şəhərinin mərkəzində — Heydər Əliyev prospektində, "Meqastore"in yaxınlığında tez-tez görmək mümkündür.
Sakinlər suvarma kanallarının vaxtında təmizlənməsinin kənd təsərrüfatı üçün həyati əhəmiyyət daşıdığını vurğulayaraq, texnikaların təyinatı üzrə istifadəsini və problemin təcili həllini tələb edirlər.
