Quba Rayon İcra Hakimiyyətinin başçısı İlqar Mahmudov Buduq kənd inzibati ərazi dairəsinin Yalavanc kəndində sakinlərlə növbəti səyyar qəbul keçirib.
Shimal.News xəbər verir ki, qəbulda Dövlət Təhlükəsizliyi Xidmətinin Quba rayon şöbəsinin rəisi, Quba Rayon Ağsaqqallar Şurasının sədri, eləcə də rayonun idarə, müəssisə və təşkilatlarının rəhbərləri iştirak ediblər.
Rəsmi məlumata əsasən, qəbul zamanı sakinlərin müraciətləri dinlənilib, qaldırılan məsələlərin həlli istiqamətində aidiyyəti qurumların rəhbərlərinə müvafiq tapşırıqlar verilib.
Lakin yayılan məlumatda vətəndaşların hansı problemlərlə müraciət etdiyi, kənd sakinlərini narahat edən əsas məsələlərin nədən ibarət olduğu və verilən tapşırıqların konkret məzmunu açıqlanmayıb.
Qeyd edək ki, bu cür səyyar qəbulların məqsədi əhalini narahat edən problemlərin yerində öyrənilməsi və operativ həllinə nail olmaqdır. Bu baxımdan, gələcəkdə rəsmi məlumatlarda qaldırılan məsələlərin mahiyyəti, onların həlli istiqamətində görüləcək tədbirlər və icra müddətləri barədə daha ətraflı məlumatın təqdim olunması həm ictimaiyyətin məlumatlandırılması, həm də görülən işlərin şəffaflığının artırılması baxımından faydalı olardı.
