Quba rayonunda Yuxarı Tüləkəran–Möhüc–Yenikənd avtomobil yolunun Əski İqrığ kəndi ərazisindən keçən hissəsində asfalt örtüyü tamamilə çöküb.
Shimal.News-a məlumat verən sakinlərin sözlərinə görə, yolun sözügedən hissəsi hər iki istiqamətdə keçilməz vəziyyətə düşüb və avtomobillərin hərəkəti mümkünsüz olub.
Onlar bildirirlər ki, bu, həmin kənd yolunda yaranan yeganə problem deyil. Marşrut boyunca ümumilikdə 7 fərqli ərazidə çökmə baş verib və bu da nəqliyyatın hərəkətini çətinləşdirir.
Sakinlər aidiyyəti qurumların problemi yerində araşdırmasını, yolun qəzalı hissələrində təxirəsalınmaz bərpa işlərinin aparılmasını istəyirlər. Bundan başqa, mövcud vəziyyətin sürücülər və ərazi sakinləri üçün təhlükə yaratdığı vurğulanır.
