59 saylı Quba seçki dairəsinin deputatı, iqtisadçı alim Əlibala Məhərrəmzadə bölgədə məşğulluq, turizm və sosial problemlərlə bağlı diqqətçəkən açıqlamalar verib.
Modern.az-ın məlumtına görə, deputat bildirib ki, seçicilərin müraciətlərinin böyük hissəsi şəxsi problemlərlə bağlıdır. Hər ay onlarla vətəndaş qəbul edilsə də, işlə təmin olunanların əksəriyyəti qısa müddətdə işdən ayrılır.
Onun sözlərinə görə, bu vəziyyətin əsas səbəbi motivasiya çatışmazlığı və əmək intizamı ilə bağlı problemlərdir:
"İşlə təmin etdiyimiz 15 nəfərdən 10 gün sonra cəmi biri qalır".
Deputat qeyd edib ki, bəzi vətəndaşlar daimi işdə çalışmaqdansa, mövsümi işlərə üstünlük verir və qısa müddətdə daha çox qazanc əldə etməyə çalışır.
"Quba turizm potensialının 5 faizini belə istifadə etmir"Məhərrəmzadə Qubanın turizm imkanlarının hələ də tam açılmadığını bildirib. Onun sözlərinə görə, bölgə təbii şərait və coğrafi mövqe baxımından üstün olsa da, xidmət səviyyəsi və infrastruktur problemləri inkişafı ləngidir.
Deputat xüsusilə xidmət sektorunda çatışmazlıqları vurğulayıb və bu sahədə uzunmüddətli sistemli işlərin vacibliyini qeyd edib.
Gənclər niyə Rusiyaya üz tutur?Deputatın fikrincə, əsas problemlərdən biri də gənclərin erkən yaşda ölkəni tərk etməsidir:
"16-17 yaşlı gənclər Rusiyaya işləməyə gedir, halbuki eyni qazancı Qubada əldə edə bilərlər".
O bildirib ki, gəncləri cəlb edən əsas amillər yalnız maddi deyil, həm də sosial və psixoloji faktorlarla bağlıdır.
Ucuz turlar narazılıq yaradırDeputat turizm sektorunda başqa bir problemə də diqqət çəkib. Onun sözlərinə görə, Qubaya təşkil olunan 10–12 manatlıq ucuz tur paketləri geniş yayılıb, lakin bu turların keyfiyyəti aşağıdır və turistlərin narazılığına səbəb olur.
"İnsanlar ucuzluğa üstünlük verir, nəticədə keyfiyyətsiz xidmətlə qarşılaşırlar".
Əsas problem: insan faktoruDeputatın fikrincə, həm məşğulluq, həm də turizm sahəsində əsas maneə insan faktorudur. Xidmət mədəniyyətinin formalaşdırılması və əmək bazarında yanaşmanın dəyişməsi olmadan ciddi irəliləyiş mümkün deyil.
