Quba şəhərinin Heydər Əliyev prospektində yerləşən işıqforlardan biri yol hərəkəti iştirakçıları üçün real təhlükə mənbəyinə çevrilib.
Shimal.News-a daxil olan məlumatlara görə, sözügedən işıqforun görünüşü ciddi şəkildə məhdudlaşdırılıb.
Sürücülər bildirirlər ki, prospektin Tofiq Əhmədov küçəsi ilə kəsişməsində nəqliyyat və piyada axınının intensivliyi təhlükə riskini daha da artırır. Sürücülərin sözlərinə görə, piyada keçidinin qarşısında saxlayan avtobuslar həm işıqforu, həm də yolu keçmək istəyən piyadaları gizlədir. Nəticədə iri nəqliyyat vasitələrinin önündən qəfil yola çıxan piyadalar qəza şəraiti yaradır.
Ağır yol-nəqliyyat hadisələrinin qarşısını almaq üçün sakinlər və sürücülər aidiyyəti dövlət qurumlarına müraciət edərək, işıqforun yerinin dəyişdirilməsini, görünüşün açılmasını və avtobus dayanacağının təhlükəsiz məsafəyə köçürülməsini tələb edirlər.
