Quba şəhərinin yaxınlığında zibil poliqonunun yanması yenidən sakinlərin narazılığına səbəb olub.
Shimal.News-a daxil olan məlumata görə, tullantıların yandırılması nəticəsində yaranan ağır tüstü axşam saatlarında şəhərin bir hissəsini və ətraf kəndləri bürüyüb.
Sakinlər bildirirlər ki, yay mövsümü olduğundan insanlar axşam saatlarında həyətdə istirahət edir, evlərin qapı və pəncərələri açıq qalır. Lakin tüstü yaşayış evlərinə dolduğu üçün nəfəs almaq çətinləşir.
Onların sözlərinə görə, tüstü o qədər sıx olur ki, gecə saatlarında küçələrin işıq dirəklərinin altında belə aydın görünür.
Vətəndaşlar qeyd edirlər ki, bu, ilk belə hal deyil. Ötən il də eyni problem yaşanıb, zibil poliqonunda baş verən yanğın günlərlə ətraf əraziləri tüstü altında saxlamışdı.
Vətəndaşlar aidiyyəti qurumlardan problemin təkrarlanmaması üçün zibil poliqonunda yanğınların qarşısının alınması və ərazidə nəzarətin gücləndirilməsini xahiş edirlər.
