Qubanın turistik məkanlarından biri olan Qımılqazma kəndi ərazisində bir müddət əvvəl ölümlə nəticələnən hadisəyə baxmayaraq, təhlükəli mənzərə yenidən təkrarlanır.
Shimal.News-a daxil olan görüntülərdən məlum olur ki, əraziyə gələn çoxsaylı turistlər açıq sahədə at gəzintisi, kvadrosikl və digər əyləncə növlərindən istifadə edirlər. Bu fəaliyyət bölgəyə gələn turistlərin sayını artırmaqla yanaşı, yerli sakinlərin bir qisminə mövsümi gəlir əldə etmək imkanı da yaradır.
Lakin ən ciddi problem at və kvadrosikllə birbaşa avtomobil yoluna çıxılmasıdır. Həm istirahət məqsədilə gələn şəxslər, həm də hərəkətdə olan nəqliyyat vasitələrinin sürücüləri üçün bu vəziyyət real təhlükə yaradır.
Bununla yanaşı, kvadrosikllərin yaratdığı yüksək səs-küy də ərazidə yaşayan bəzi sakinlərin narazılığına səbəb olur.
Xatırladaq ki, mart ayında məhz bu ərazidə baş vermiş oxşar hadisə 27 yaşlı gəncin ölümü ilə nəticələnmişdi. Həmin faciədən sonra təhlükəsizlik tədbirlərinin gücləndiriləcəyi gözlənilsə də, hazırkı vəziyyət göstərir ki, təhlükəli davranışlardan nəticə çıxarılmayıb.
Bundan əlavə, təhlükəsizlik qaydalarına əməl olunması məsələsi də ciddi suallar doğurur. At gəzintiləri və kvadrosikl turları müəyyən təhlükəsizlik standartlarına uyğun təşkil edilməlidir. Xüsusilə yaş məhdudiyyətinə riayət olunması, azyaşlıların bu nəqliyyat vasitələrini idarə etməsinə yol verilməməsi, eləcə də dəbilqə və digər fərdi mühafizə vasitələrinin məcburi istifadəsinə nəzarət vacib şərtlərdəndir. Lakin ərazidə müşahidə olunan mənzərə göstərir ki, bəzi hallarda bu tələblərə lazımi səviyyədə əməl edilmir.
Turizmin inkişafı bölgə üçün mühüm əhəmiyyət daşısa da, insan həyatı hər şeydən önəmlidir. Aidiyyəti qurumların ərazidə təhlükəsizlik qaydalarına nəzarəti gücləndirməsi, at və kvadrosikl xidmətləri göstərən şəxslərin fəaliyyətinə nəzarət etməsi, avtomobil yoluna çıxışın qarşısını alması, yaş həddi və dəbilqə tələblərinin icrasını təmin etməsi zəruridir. Əks halda, mart ayında yaşanan faciənin yenidən təkrarlanması riski qalmaqda davam edir.
