Bakı-Quba-Rusiya Federasiyası dövlət sərhədi avtomobil yolunun Quba şəhərindən keçən hissəsində işıqlandırma sisteminin olmaması sürücülərin narahatlığına səbəb olur. Qusar rayonu və Samur sərhəd-keçid məntəqəsi istiqamətində uzanan əsas magistralda gecə saatlarında hərəkət edənlər məhdud görünmə şəraiti ilə üzləşirlər.
Məsələ ilə bağlı Shimal.News-a danışan sürücülərin sözlərinə görə, magistralın şəhər ərazisindən keçən hissəsi demək olar ki, tam qaranlıqdır. Nəticədə sürücülər yalnız avtomobillərin ön fənərlərinin işığı ilə hərəkət etmək məcburiyyətində qalırlar. Bu isə xüsusilə döngələrdə, yağışlı havalarda və qarşıdan gələn nəqliyyat vasitələrinin işıqları göz qamaşdırdıqda qəza riskini artırır.
Yolun intensivliyi nəzərə alınarsa, Quba şəhərindən keçən hissənin müasir işıqlandırma sistemi ilə təmin edilməsi həm sürücülərin təhlükəsizliyinin artırılması, həm də yol hərəkətinin daha rahat təşkili baxımından zəruri hesab olunur.
Sürücülər ümid edirlər ki, aidiyyəti qurumlar mövcud vəziyyəti nəzərə alaraq magistralın Quba şəhərindən keçən hissəsində işıqlandırma sisteminin quraşdırılması istiqamətində zəruri addımlar atacaqlar.
