Quba şəhərində ictimai nəqliyyat dayanacaqları natəmiz və sökülmüş haldadır. Bu barədə ShimalNews 26 iyul tarixində “Report”a istinadən məlumat verir.
Sakinlər bildiriblər ki, qurğuların “dayanmağa” gücü qalmayıb. Dayanacaqların qoruyucu şüşəsi və dam örtüyü yoxdur. Divarlar isə müxtəlif sözlərlə bəzənib. Buna görə də sərnişinlər ictimai nəqliyyatı yol kənarındakı ağacların altında gözləməyə üstünlük verirlər.
Məsələ ilə bağlı Quba şəhər icra nümayəndəliyinin əməkdaşı İsmayıl İsmayılov açıqlama verib. O bildirib ki, artıq şəhərdəki dayanacaqların yeniləri ilə əvəz olunması müzakirə edilib və tezliklə bu prosesə başlanılacaq:
“İndi hər şey tədricən müasirləşdiyi kimi, dayanacaqların da yeni standartlara uyğunlaşdırılması labüddür. Bununla əlaqədar Quba Rayon İcra Hakimiyyətində müzakirə aparılıb. Yəqin ki, yaxın dövrdə çox müasir üslublu, memarlıq baxımından görkəmli dayanacaqlar sakinlərin istifadəsinə veriləcək”.
