Quba şəhəri Heydər Əliyev prospektində yolun kənarında yığılan qar və buz parçalarının Mənzil-Kommunal Təsərrüfat Birliyinin əməkdaşları tərəfindən yolun hərəkət hissəsinə atıldığı müşahidə edilib.
Bununla bağlı Shimal.News redaksiyasına daxil olan şikayətdə bildirilir ki, belə hallar avtomobillərin hərəkətinə ciddi maneə yaradır və qəza riskini artırır.
Hadisə şahidlərinin göndərdiyi foto və videomateriallarda qar yığınının birbaşa yola atıldığı aydın görünür. Bu isə xüsusilə qarlı və buzlu havalarda nəqliyyat vasitələrinin sürüşmə riskini artıraraq sürücülər üçün təhlükəli vəziyyət yaradır.
Ekspertlərin sözlərinə, yollardan təmizlənən qar və buzun düzgün idarə olunması vacibdir. Əslində bu cür tullantıların xüsusi texnika vasitəsilə maşınların yük hissəsinə yığılıb şəhər kənarına daşınması daha məqsədəuyğundur. Bu, həm yolların təmiz və təhlükəsiz saxlanılmasına kömək edər, həm də mümkün qəza hallarının qarşısını alar.
