Qubanın Qəçrəş kəndi yolunda yerləşən "Alma Bağı" hotelində qonaqlar arasında baş verən dava məhkəmə mübahisəsinə çevrilib.
Qafqazinfo.az-ın yaydığı məlumata görə, hadisə ötən ilin qışında baş verib. İddiaya əsasən, gecə saatlarında yüksək səslə musiqi və səs-küy səbəbindən tərəflər arasında mübahisə yaranıb, daha sonra əlbəyaxa dava düşüb.
Məlumata görə, gecə yarısı 31 yaşlı Kənan İsmayıllı, dostu Mahir və iki xanım tanışı hotel otağında yüksək səslə musiqi dinləyib, nalayiq ifadələr işlədiblər. Həmin vaxt qonşu otaqda 52 yaşlı Ceyhun Nəcəfov ailə üzvləri ilə istirahət edirdi.
Ceyhun əvvəlcə vəziyyətlə bağlı hotel nəzarətçilərinə müraciət edib. Bir müddət sonra səs-küy yenidən davam etdiyindən o, qonşu otağa gedərək qapını təpiklə vurmağa başlayıb. Kənan otaqdan çıxdıqdan sonra tərəflər arasında əlbəyaxa dava baş verib.
Hadisəyə Ceyhun Nəcəfovun hoteldə olan bacanağı Xəqani Əliyev və digər qohumları da qoşulublar. Qarşıdurma yalnız polis əməkdaşlarının müdaxiləsindən sonra başa çatıb.
Araşdırmanın nəticəsində Ceyhun Nəcəfov zərərçəkmiş, Kənan İsmayıllı isə təqsirləndirilən şəxs qismində tanınıb. İstintaqın qərarı tibbi ekspertizaya əsaslanıb. Rəyə görə, Ceyhun Nəcəfovun aldığı zərbələr daha ağır olub və onun burun sümükləri sınıb. Kənanın bədənində aşkar edilən xəsarətlər isə sağlamlığa zərər vurma əlamətləri yaratmadığından dərəcəsi müəyyən edilməyən xəsarətlər kimi qiymətləndirilib.
Kənan İsmayıllı məhkəmədə özünü təqsirli bilməyib. O, əksinə, hotelin dəhlizində bir neçə nəfər tərəfindən yerə yıxılaraq döyüldüyünü və hadisənin təhlükəsizlik kameraları tərəfindən qeydə alındığını deyib. Üstəlik zərərçəkmiş şəxsin yüksək vəzifəli şəxs olduğunu və bunun işin gedişinə təsir göstərdiyini iddia edib.
Kənanın sözlərinə görə, Ceyhun Nəcəfov İqtisadiyyat Nazirliyinin Tarif-Qiymət Siyasəti Şöbəsinin müdiridir. O, işə yenidən baxılmasını, hadisəni əks etdirən videonun sübut kimi qəbul edilməsini və qanun qarşısında bərabərlik prinsipi əsasında barəsində bəraət hökmü çıxarılmasını tələb edir.
Etirazdan sonra Ceyhun Nəcəfov da əvvəlki barışıq mövqeyindən imtina edib. Hazırda şikayətə Sumqayıt Apellyasiya Məhkəməsində baxılır və yekun qərar hələ açıqlanmayıb.
