Quba Regional Perinatal Mərkəzində vaxtından əvvəl dünyaya gələn körpənin həyatı həkimlərin səyi nəticəsində xilas edilib.
Shimal.News xəbər verir ki, 2006-cı il təvəllüdlü qadın martın 29-da doğuş təhlükəsi ilə mərkəzə müraciət edib. Həkimlər tərəfindən ona vaxtından əvvəl doğuş təhlükəsi, sidik-cinsiyyət sistemi infeksiyası və istmiko-servikal çatışmazlıq diaqnozları qoyulub.
Doğuş zamanı çəkisi cəmi 850 qram, boyu isə 32 santimetr olan oğlan uşağı dünyaya gəlib. Körpənin vəziyyəti ağır qiymətləndirildiyi üçün ona dərhal reanimasiya və ixtisaslaşmış neonatal yardım göstərilib.
Körpə 2 aydan artıq küvez şəraitində müalicə alıb, tənəffüs dəstəyi və dövlət təminatlı surfaktant terapiyası tətbiq olunub. Müalicə nəticəsində onun çəkisi 2 kiloqram 30 qrama çatıb.
Səhhəti stabilləşən körpə və anası həkim nəzarətindən sonra evə buraxılıb.
